Nakatalaan i-export o iluwas an nasa $2 billion na kantidad kan langis kan Venezuela pasiring Amerika.
Ini makalihis magkasundo na an US asin Venezuela para sa nasambitan na usapin.
Pigkokonsederar man ni US President Donald Trump an nasambitan na kasunduan komo sarong flagship negotiation para ma-divert an mga suplay kan langis gikan sa China mantang makakatabang man ini sa Venezuela tanganing malikayan an mas matindi pang tapyas sa produksiyon kan langis.
Marurumduman, an Venezuela igwang milyun-milyong bariles kan langis na nasa mga tanker asin nakaimbak sa mga tangke na dae magibong maibiyahe huli sa pagharang sa exports na pigpautob ni Trump puon pa kan katahawan kan buwan nin Disyembre.
An nasambitan na blockade parte kan tumitinding pressure kan US sa gobyerno ni Venezuelan President Nicolas Maduro na nagresulta sa pagkakadakop kaini kan nakalihis na semana.
Susog sa sarong post, sinaysay ni Trump na ititurn-over kan Venezuela an nasa pagultanan kan 30 million asin 50 million bariles kan sanctioned oil sa US.
Pigbenta soboot an nasambitang mga langis sa Market price kaini, asin an kwartang malilikom gikan digde kokontrolon kan US President para masiertong magagamit ini sa benepisyo kan namamanwaan sa Venezuela asin kan Amerika.
Sigun ki Trump, si US Energy Secretary Christ Wright, an nakatoka sa pagpapautob kan kasunduan asin an langis ibibiyahe kan mga barko direkta pasiring sa mga daungan kan Amerika.
