Duwang tao an naireport na binawian nin buhay mantang labi sa 20 iba pa an irido makalihis bumangga an sarong Mexican Naval Ship sa Brooklyn Bridge kan nakalihis na Sabado nin pagkabanggi, (Domingo sa Pilipinas) sigun ki Mayor Eric Adams.
Susog sa U.S. Coast Guard, 21 katao an nalugadan na tulos man na isinakay sa sadit na baruto pasiring pampang antes dinara sa ospital.
Naenot nang sinabi ni Adams na 19 an nalugadan, duwa an nasa kritikal na kondisyon, asin man duwa an gadan huli sa saindang sinapong danyos.
Nangyari an nasambitan ng insidente bandang 8:20 nin pagkabanggi, (oras sa America) sigun pa ki Chief Wilson Aramboles kan New York Police Department (NYPD) Special Operations Division.
Sigun man sa alkalde, an nasambitan ng barko, an lunad nin 277 katao, an nawaran nin kontrol huli sa mechanical error mantang papaluwas gikan Pier 17 na pasiring kuta sa Iceland.
Binisto an barko na ARM Cuauhtémoc, sarong training vessel kan Mexican Navy.
Duwang tripulante man an nasa masts kaini an nalugadan sa banggaan. Mayo man nin nahulog sa tubig, alagad tulos na isinagibo an inspeksyon sa tulay. Sigun ki Department of Transportation Commissioner Ydanis Rodriguez, mayong nahiling nin seryosong danyos sa Brooklyn Bridge.
Siringpaman, isinarado paramientras an operation sa East River, an nagtugdok kan “safety zone” sa pag-ultanan kan Brooklyn asin man Manhattan Bridge.
Mahihiling man sa mga nagkuriyat na video an duwang masts kan barko na tumama sa tulay, mantang may mga taong nakasabit sa mga inu. Mahihiling man an mga lugadang isinakay sa stretcher makalihis an insidente. Madadangog pa an mga tao sa pampang na nagkukurahaw nin “Mexico! Mexico!”
Kinumpirmar ni Esteban Moctezuma Barragán, ambassador kan Mexico sa U.S., na an barko ay parte kan Mexican Navy, alagad dae man soboot ini opisyal na kabali sa Sail4th 250 event sa 2026.
Mientrastanto padagos an ginigibong imbestigasyon kan NYPD asin man pinaglalaomang masagibo nin suhay na imbestigasyon an National Transportation Safety Board (NTSB).
Inabisuhan pa an publiko na likyan paramientras an lugar harani sa nasambitan ng tulay.
