Duwang dakulang international events an pigpreparan kan Philippine Olympic Committee (POC) na isasagibo sa nasyon sa huring parte kan 2027 asin enot na parte kan 2028.
Enot na an inaugural hosting kan Southeast Asian Plus Youth Games o SEA Plus YG na ikukundusir sa huring parte kan 2027.
Pigsaysay man ni POC President Abrahan “Bambol” Tolentino na igwa man Asian Beach Games sa Kalendaryo.
Makalihis an pakikipag-koordinar sa Olympic Council of Asia (OCA), an nasyon an ma-host kan SEA Plus YG sa huring parte kan 2027 imbes na sa inot na parte kan 2028, sigun ki Tolentino.
An ABG, sigun sa POC chief, ikukundusir man sa enot na parte kan 2028 alagad dae pighayag an venue.
Sinabi kaini na an duwang international hosting tugma sa mas pinapapusog na sports tourism campaign kan Philippine Sports Commission (PSC) sa paagi kan Chairman kaining si Patrick “Pato” Gregorio.
An POC asin PSC nasa sarong pahina sa sports tourism campaign kaibahan si Presidente Ferdinand Marcos Jr. na nagbilog kan nakalihis na taon kan National Sports Tourism Inter-Agency Committe (NST-IAC) na pigpamunuan ni Gregorio.
Dugang pa ni Tolentino na malangkaw an piglalaoman na partisipasyon kan mga atletang Pilipino sa Milano-Cortina Winter Olympics sa masunod na bulan pati naman sa Sanya ABG sa Abril 22 hasta 30.
Kaibahan man sa kalendaryo kan POC an Nagoya Asian Games sa Setyembre asin Jeddah Asian Indoor and Martial Arts Games
An SEA Plus YG para sa mga atletang may edad 17-anyos na malaban sa duwang mandatory sports asin maximum 12 Olympic sports.
