NAGA CITY– Nasa marhay nang kamugtakan ngonyan an duwang soldados na suboot nairido makalihis na makabakbakan an mga rebeldeng New People’s Army (NPA) sa Mauban, Quezon.
Sa entrevista kan Bombo Radyo Naga ki Capt. Patrick Jay Retumban, chief kan Division of Public Affairs Office (DPAO) kan 2nd Infantry Division, Philippine Army, sinaysay kaining sarong impormasyon suboot an saindang naresibe hale sa mga residente sa lugar na igwang sarong grupo nin mga rebelde na naghahagad nin kwarta asin pagkakan sa mga tao.
Katakod kaini, tulos man na nagresponde an tropa kan 1st Infantry Batallion kun saen naabutan kan mga ini an pigkakarkulong nasa 12 miembros kan mga rebelde na napuli sa haros 30 minuto na riribayan nin putok kun saen tinamaan nin bala an duwa sa mga soldados.
Sa clearing operation kan mga otoridad, narekober sa lugar an sarong M16 rifle mantang pigtutubudang na kadakol sa mga rebelde an nairido huli sa kadakol na tagdo nin dugo na nawalat sa encounter site.
Sa ibong kaini, nangapodan man si Retumban sa mga nairidong rebelde na magbutwa na sana huli ta nakaandam an kasoldadusan na ipabulong an mga ini.
