Dae mababa sa 20 katao na mga turista an binawian nin buhay makalihis an pangbadil kan mga pinagtutubudang militanteng grupo sa Pahalgam, sarong sikat na destinasyon sa Jammu asin Kashmir, India.
Sigun sa mga testigo, nabigla sinda sa sunod-sunod na putok na pighuna nindang paputok sana, alagad tulos man nindang nasabutan an peligro kan madangog na an makusog na kurahaw kan mga tao.
Inako man kan grupong “Kashmir Resistance” an responsibilidad sa social media, sinasabing nagkontra sinda sa soboot pagheheras nin labi sa 85,000 na mga “dayuhan” sa rehiyon, na kinokonsiderar nindang pagbabago sa Kashmir.
Mahigot na kinondenar ni Prime Minister Narendra Modi an pag-atake asin nagpromisa na papanimbagon an mga nasa likod kaini.
An insidente an nangyari sarong aldaw makalihis na mag abot sa India si US Vice President JD Vance sa sarong personal visit.
