Nagpahayag an sarong environmental group kan saindang kamawotan na makipagtabangan sa lokal na gobyerno kan Naga para mas mapakusog pa an implementasyon kan proper waste management sa syudad.
Sa entrevista kan Bombo Radyo Naga ki Ochi Tolentino, zero-waste campaigner kan EcoWaste Coalition, sinabi kaini na positibo nindang inako an imbitasyon kan Lokal na Gobyerno kan Naga na maging katuwang sa pagtulod kan mga programa sa kapalibutan, partikularmente an katuyuhan na makamtan an “zero-waste” na komunidad.
Sinabi ni Tolentino na nahihiling kan organisasyon an potensyal kan Ciudad nin Naga na magin modelo sa tamang solid waste management, urog na kun lubos na iimplementar an Republic Act 9003 o an Ecological Solid Waste Management Act of 2000.
Dugang pa kaini na parte kan saindang adbokasiya iyo an pagtabang sa mga lokal na gobyerno, barangay, eskwelahan asin iba pang institusyon na maiimplementar an tamang waste separation gikan mismo sa mga harong.
An EcoWaste Coalition nag-anunsyo man na andam sindang magtao nin technical support asin mga programa na matukdo sa mga residente kan tamang pag-segregar kan basura, pag-compost, asin pagbawas kan paggamit nin single-use plastics.
Mientrastanto, piglalaoman na an nasabing pakikipagtabangan makakabukas nin mas mahiwas na kampanya sa ciudad, urog na sa pagpapakusog kan environmental awareness asin pagsunod sa mga existing environmental laws.
Padagos na pig-eenkaminar kan grupo an publiko na makipagtabangan sa mga inisyatiba kan gobyerno tanganing mamantenir an malinig na kapalibutan asin maseguro an mas ligtas na puturo para sa masunod na henerasyon.
