NAGA CITY- Nagtitinir na apektado kan tagtuyot an kabilugang 26 na probinsya sa bilog na nasyon sa ibong kan paglaog nin tag-uran.
Sigun sa Department of Science and Technology(DOST), apat digde an gikan sa Luzon, 12 an gikan sa Visayas, mantang an natatadang sampulo an gikan sa Mindanao.
Sa Luzon, ini an pigbibilog kan mga probinsiya kan Apayao, Batanes, Cagayan asin Palawan.
Sa Visayas, kinababalihan ini kan Aklan, Antique, Bohol, Capiz, Cebu, Guimaras, Iloilo, Leyte, Negros Occidental, Negros Oriental, Siquijor asin Southern Leyte.
Mantang sa Mindanao, kinnzababalihan ini kan Basilan, Camiguin, Lanao del Norte, Lanao del Sur, Misamis Occidental, Misamis Oriental, Tawi-Tawi, Zamboanga del Norte, Zamboanga del Sur asin Zamboanga Sibugay.
An mga ini an nakakaeksperyensuya nin nasa 21-60% na pagbaba kan namamateang pag-uran sa laog kan limang magkakasunod na bulan.
Alagad, piglalaoman man na mababa na sana sa duwang probinsya an maaapektaran kan tagtuyot sa pagtatapos kan Hunyo an Apayao asin Cagayan.
Mientrastanto, pigdeklarar kan state weather bureau an pagpupuon kan rainy season kan May 29, kasunod kan panlalamasa kan bagyong Aghon asin kan paglaog nin Habagat.
