NAGA CITY-Nagtitinir na matuninong an duwang banwaan sa Partido Area sa probinsiya kan Camarines Sur maski nakabugtak ngunyan sa orange category para sa nararani na 2025 midterm elections. An nasambitan ng mga banwaan iyo an Tinambac, Presentacion asin Ragay.
Sigun sa Camarines Sur Police Provincial Office sa paglaog kan taong 2025 mayo nang namo-monitor na presensya kan rebeldeng grupo sa mga nasambitan ng lugar.
Alagad dae man nagpapakampante an mga kapulisan kun kaya nagpapadagos pa man giraray an saindang ginigibong monitoring asin naka-alerto orog na ta 51 na aldaw na sana maabot na an eleksyon sa Mayo 12.
Katakod kaini, pigsaysay kan hepatura na igwang kakulangan sa saindang mga personahe alagad piglalaoman man na matatawan nin augmentation force gikan sa Command Center an Camarines Sur tanganing makatabang sa pagmantinir kan katuninungan sa enterong probinsiya.
Pigsierto man kan opisyal na sa banwaan kan Tinambac, Presentacion asin Ragay igwang nakabantay na mga kapulisan sa mga checkpoint tanganing tolos na ma-verify kun igwang huma na pwedeng magbungkaras.
Marurumduman, enot nang pigsaysay kan Comelec na piglaaoman pa kan saindang lado na madudugangan an mga nakabugtak sa red category orog na ta igwang mga areas an mahigot na pigbabantayan huli sa posibilidad na magigin mainit an pulitika orog na sa pagpuon kan karampanyahan sa lokal na posisyon.
