NAGA CITY- Maabot sa 100 pasahero an na-stranded sa tolong pantalan sa Bicol region huli sa Tropical Storm Crising, sigun sa Philippine Coast Guard.
Sigun ki PCG 5 Bicol Commander, Commodore Ivan Roldan, nagpakol sa 64 na pasahero asin 21 na roll-on/roll-off (RoRo) ships an na-stranded sa Tabaco Port sa probinsiya nin Albay, 27 pasahero asin 13 RoRo ships sa Virac Port, siringman pitong pasahero sa San Andres Port, parehas sa probinsiya kan Catanduanes.
Apat na vessels an na-stranded sa Tabaco Port asin tolo sa Virac Port, kun saen sarong bangka an kinaipuhan na makidagos.
Dugang pa kan opisyal, gabos na klase kan lunadang pandagat an pigsuspender sa probinsiya nin Catanduanes, Camarines Norte, asin Camarines Sur para sa kasalbaduhan kan mga pasahero.
Pigsaysay pa ni Roldan na an saindang ahensiya an nakaalerto kun saen mapakol man sa 400 na personahe an naka-standby sa tubig asin daga.
Mientrastanto, enot naman na nagpatanid an state weather agency na laoman pa man giraray an makusog na pag-uuran orog na sa nababanderahan kan Tropical Storm Crising.
Marurumduman, nagkawsa nin labing pagbaha sa ibang area sa bilog na nasyon an nasambitan ng Bagyo kun kaya kinaipuhan man na iibakwar an kadakol na mga residente na apektado kaini.
Pigsierto man ni Presidente Ferdinand Marcos Jr na preparado ang gobierno na magsimbag sa pangangaipuhan kan apektado kan bagyo.
