NAGA CITY- Limang mga barangay officials kabale na an sarong barangay kapitan asin apat na mga kagawad sa Camarines Sur an kabale sa narco-list na ipinaluwas kan Philippine Drug Enforcement Agency (PDEA).
Kabale sa mga ini sinda Ariel Mirabueno, Barangay Kagawad kan Cabuyao, Sipocot; Natividad Bombita, Barangay Kagawad kan Sugod, Tinambac; Nepthalie Mapuso, Barangay Kagawad kan Poblacion, Siruma; Charlie Parpan, Barangay Kagawad kan Bagong Bayan Pequeño, Goa, asin Oriel Legazpi Jr, Barangay Kapitan kan Peñafrancia, Del Gallego.
Sa pag-aadal kan Bombo Radyo Naga, napag-araman na nagkapira sa sainda an enot nang naimbwelto sa transaksyon kan pigpapangalad na bulong asin naarestar pa sa pigkondusir na anti-illegal drug operations kan mga otoridad.
Marurumduman na kan Mayo 2017 kan maarestar si Mirabueno na suboot ikatolo sa provincial drug watchlist kan probinsya na nakuanan nin badil asin pitong sachet na naglalaog kan pigtutubudang iligal na droga.
Ipigkokonsiderar man na High Value Target (HVT) kan PDEA asin panlima sa Municipal Drug Watchlist si Mapuso na nadakop kan Hunyo, 2017 makalihis na marekober sa saiya an 38 sachet na naglalaog nin pigtutubudang shabu.
Nobyembre 2016 man kan makua sa harong mismo ni Legazpi an sachet kan pigtutubudang shabu asin mga bala para sa M16.
Dae man naarestar kan mga otoridad si Legazpi huli ta mayo suboot ini sa lugar kan iserbe an search warrant laban digdi.
