NAGA CITY- Maabot sa labi 30,000 pamilya na ngunian an pignaebakwar sa probinsya nin Camarines Sur huli sa mayong untok na bulos kan uran na dara kan tail end of the cold front.
Sa entrevista kan Bombo Radyo-Naga ki Che Bermeo, pamayo kan Provincial Disaster Risk Reduction Management Council (PDRRMC) Camarines Sur, napag-araman na an nasambitan ng mga residente an gikan sa haros 100 Barangay na gikan sa kabilugang 24 mga banwaan na apektado kan mahewasang pagbaha puon pa kasuudma.
Ngunian na aldaw, nakatalaan man na manao nin mga food packs an provincial government mantang enot naman na nanao nin tabang subanggi an manlaen laen na LGU.
May mga nairehistro man na landslide sa anom na barangay sa mga banwaan kan Lagonoy, San Jose, Caramoan asin Presentacion.
Mientrastanto, padagos man na pinaghahanap ngunian kan Philippine Coast Guard (PCG) Camarines Sur an limang parasira gikan sa mga naglubog na motorized banca sa kadagatang sakop kan Tinambac asin Caramoan.
Napag-araman na nagpa-rescue sa sarong grupo nin mga parasira an duwang parasira na gikan sa Catanduanes makalihis maglubog an piglulunadang bangka kan mga ini alagad kan pasiring na sa pampang, naglubog man an piglulunadang motorized banca kan mga ini rason para magkasuruwayan an nasa 13 mga parasira asin siyam sana sa sainda an enot na na-rescue.
Sa banwaan kan man Caramoan, duwang motorized banca na gikan sa Presentacion an papuli na kuta na sa banwaan kan Caramoan kan magtaob man an saindang lunadan.
Naisalbar an tolong mga parasira alagad saro sa sainda an padagos na pinaghahanap.
Maswerte man na naisalbar an 14 mga tripulante kan sarong fishing vessel na gikan sa banwaan kan Mercedes, Camarines Norte sa banwaan kan Siruma, Camarines Sur.
