Kinumpirmar ni Department of Migrant Workers (DMW) Sec. Hans Leo Cacdac na nasa marahay na kamugtakan an 31 Pinoy na dae nakabiyahe huli man sa dagusang pagsasarado kan gobyerno kan Qatar sa airspace kaini.
Sigun ki Sec. Cacdac, nakatalaan kuta na magpuli sa Pilipinas an mga ini, gamit an Doha Hamad International Airport.
Siringpaman, huli sa biglaang pagsarado sa Qatari airspace, dae na tinugutang makalupad an lunadang commercial plane asin pinatinir an mga Pinoy sa laog kan terminal para sa saindang kasalbaduhan.
An grupo kan mga Pilipino an pigbibilog kan OFW kun saen kadaklan sa sainda an gikan pa sa Israel na 26 gabos.
Tulo gikan sa grupo an gikan man sa Jordan, mantang tigsaro gikan sa Qatar asin Palestine na parehas mga nasyong naiipit sa kariribokan sa Middle East.
Sa presente, mayo pang impormasyon kun nuarin madadagos an pagpuli kan mga Pinoy, alagad siniguro kan sekretaryo na nasa marahay an saindang kamugtakan mantang hinahalat an dagusan nindang pagbiyahe.
Marurumdumang isinarado kan Qatari government an himpapawid kaini makalihis magluwas nin abiso an Iran na papasabugon kaini an Al Udeid Air Base, sarong US military basado sa Qatar. Pinalupad kan Iran an nagkapirang mga short-range asin medium range ballistic missiles sa nasambitan ng pasilidad.
