NAGA CITY-Nakapagrehistro an Provincial Veterinary Office kan Negros Occidental nin kabilugang 3,421 nin nagadan na hayop sa nasambitang probinsya huli sa epekto kan pagputok kan bulkang Kanlaon.
An mga nasambitang hayop pighihinalaan na naapektaran sa mahewasang ashfall na nangyari kasunod kan pagputok kan nasambitan asin halangkaw na sulfur dioxide emission kan bulkan.
Basado sa nairehistro kan ahensya, kabilugang 3,210 nin manok an nagadan mantang an natatada man nin 211 binibilog nin mga baka, damulag, kambing, orig, asin tupa.
Nagluluwas man sa pigsagibong research kan nasambitang opisina na nagkaigwa an mga ini nin respiratory infection asin problema sa pagkakan o digestive problem, huli na man sa pagkakalanghap asin haloy na exposure sa sulfur.
Marurumdumang kasunod kan nagin pagputok kan bulkan pirang serye nin veterinary medical mission an pigsagibo sa mga barangay tangani na masimbagan an helang kan mga hayop na posibleng nakua sa nangyaring pagsabog.
