Umabot sa 37 ang kabuuang bilang ng mga nasawi matapos ang malakas na lindol na yumanig sa Mindanao, ayon sa Office of Civil Defense (OCD).
Karamihan sa mga biktima ay mula sa Soccsksargen at Davao Region, habang daan-daan naman ang nasugatan at libo-libong pamilya ang naapektuhan ng sakuna.
Batay sa ulat ng OCD hanggang alas-6 ng umaga noong Hunyo 9, 2026, 33 ang namatay sa Soccsksargen (18 sa Sarangani, 12 sa General Santos City, at 3 sa South Cotabato) at 4 pa sa Davao Region.
Kadalasang sanhi ng pagkamatay ay ang pagkapukpok o pagkatamaan ng bumagsak na debris. Naiulat din ang 456 na sugatan at apat na nawawala.
Tinatayang 17,689 pamilya o 77,186 indibidwal ang apektado ng magnitude 7.8 na lindol na tumama sa Sarangani noong Hunyo 8. Patuloy ang search, rescue, at retrieval operations sa General Santos City at Sarangani, na kabilang sa mga pinakatinamaan.
Idineklara na ang state of calamity sa General Santos City, habang nagpapatuloy ang pag-deploy ng mga responder sa iba pang apektadong lugar. Sa paunang pagtataya, 9 tulay at 19 kalsada ang nasira, at umabot sa mahigit ₱900 milyon ang pinsala sa imprastraktura.
Aabot sa 1,889 na bahay ang napinsala, kung saan halos 1,500 ang tuluyang gumuho.
May iniulat ding pinsala sa General Santos International Airport kaya’t nakansela ang mga komersyal na biyahe. Pinahintulutan lamang ng Civil Aviation Authority of the Philippines ang paggamit nito para sa military, government, at humanitarian flights.
Dahil sa patuloy na aftershocks, maraming residente ang nananatili muna sa mga open area dahil sa takot na bumagsak pa ang kanilang mga tirahan.
Pinag-aaralan ng pamahalaan ang pagtatayo ng mga pansamantalang tirahan o tent cities para sa mga nawalan ng bahay.
Nagpadala na rin ng mga generator at supply ng gasolina sa mga ospital at iba pang kritikal na pasilidad na naapektuhan ng brownout.
Samantala, sinuspinde rin ang klase sa ilang lugar noong Hunyo 9 bilang pag-iingat.
