Nagpakol na sa labi sa 37M an kabilogang kantidad nin tabang gikan sa Department of Social Welfare and Development (DSWD) para sa mga pamilyang padagos na naapektaran kan pinagsalak na epekto kan Bagyong Crising asin kan habagat.
Sigun ki Assistant Secretary Irene Dumlao kan DSWD Disaster Response Management Group, binibilog an tabang kan 53,383 family food packs, ready-to-eat food, asin non-food items na tulos na naihatod sa mga komunidad na sinalanta kan kalamidad.
Basado sa report kan DSWD-Disaster Response Operations Management, Information and Communication (DROMIC), mapakol sa labi sa 151,000 na pamilya o 523,686 indibidwal gikan man sa 1,134 na mga barangay an naaapektaran kan nakalihis na kalamidad.
Gikan sa kabilogang numero nin mga apektadong pamilya, labi sa 9,000 pamilya o 33,608 indibidwal an paramientras na nagdadagos sa 407 evacuation centers.
Dugang pa ni Dumlao na padagos an pakikipagkoordinar kan kagawaran sa mga lokal na gobyerno (LGU) tangani maihatod an tabang.
Katakod pa kaini, sabay sa dagos-dagos na pagheheras nin tabang an mayong untok na produksyon nin food packs sa DSWD National Resource Operation Center (NROC) sa syudad nin Pasay asin sa Visayas Disaster Response Center (VDRC) sa Mandaue City, Cebu.
May nakapreparar nin haros 3B na kantidad kan relief supplies asin stand-by funds an DSWD na pwedeng gamiton para sa nagpapadagos na disaster response operations.
