NAGA CITY- Nakatalaan na i-deploy an nasa 3,000 kapulisan tanganing masierto an kasalbaduhan asin marhay na pagpupuon kan school year 2025–2026 sa June 16 sa bilog na Rehiyong Bicol.
Sigun ki Police Regional Office Bicol Director Brig. Gen. Andre Dizon, an deployment an kasabay kan”Brigada Eskwela 2025 na obhetong suportaran an mga estudyante, magurang, paratukdo asin mga school administrators sa pagpupuon kan school year.
An saindang mga personahe an makundusir nin foot patrols, mobile patrols, asin igwang ibubugtak na manning Police Assistance Desks (PADs) na mahihiling sa mga key areas na harani sa mga eskwelahan, transport terminals, asin sa mga matatawong lugar.
Apwera digde, papahiguton man an saindang police visibility patrols sa palibot kan mga eskwelahan asin pagtaraid na komunidad.
An lakdang na ini an tanganing malikayan an mga krimen siring kan panghahabon, bullying, extortion, illegal drug activities asin iba pa na maraot kan paz y ordeen orog na sa mga matatawo na areas.
Pigsaysay pa kan opisyal na papahiguton pa kan saindang hepatura an anti-criminality operations, kabali na an checkpoint operations, Oplan Sita, asin anti-drug enforcement activities.
Siringman an mga hotlines kan gabos na police stations sa Rehiyon an operational 24/7 asin preparado na mag-ako nin emergency calls asin incident reports.
Sa ngunyan, pig-enkaminar na sana ni Dizon an publiko na magin vigilante sa saindang kapalibutan tanganing makalikay sa anuman na katibaadan.
