NAGA CITY– Pigtawan onra ni Naga City Mayor John Bongat an apat na mga estudyante hale sa sarong unibersidad sa syudad huli sa naguno na trayumpo sa Asian Accounting Education Work Group na sinagibo sa Singapore kan Hunyo 28 at 29.
Binisto an mga ini na sinda Charles Mark Arindang, Edward Lorenza Tejada, Angelique Abellada, asin si Camilia Talagtag, mga estudyante kan Ateneo de Naga University.
Sa entrevista kan Bombo Radyo Naga ki Charles Mark Arindang, sinaysay kaini na nagsagibo sinda nin business simulation kun saen kinaipuhan na pinakahalangkaw an saindang stock sales asin stock prize miski na mayo sindang mga emergency loan.
Mahigot an nagin preparasyon kan grupo huli ta pinag-adalan ninda an mga business concepts sa financial laboratory sa unibersidad kaya nagsabak sinda sa kompetisyon na pano kumpyansa.
Nahandal suboot an mga ini sa saindang mga kalaban na hale sa mga bistadong international schools asin unibersidad sa Manila alagad naglapigot na sana sinda tanganing makua an kampeonato.
Napag-araman na an mga Bicolano students na nakakua nin pinakadakol na stars na nagsirbi komo puntos na nagin basehan kan mga hurado kun si isay an gana sa kompetisyon.
