Nagtitinir na dae pa tukoy kun sain an pogmumugtakan kan apat na Pilipino sa Myanmar makalihis an makusog na 7.7-magnitude na linog kan nakalihis na aldaw nin Biyernes, Marso 28, susog sa opisyal kan Department of Foreign Affairs (DFA).
Sa sarong entrevista, sinabi ni DFA Undersecretary Eduardo de Vega na duwa sa mga nawawarang Pilipino ay sarong mag-agom, nakaistar an mga ini sa establisyemnto na nagrasay huli sa nasambitan ng linog.
Kinumpirmar man kan ahensya na an gabos nin mga nawawarang Pilipino iyo an mga pawang propesyonal, kabali na an mga paratukdo asin mga empleyado sa opisina. Mayo man naireport na Pilipinong irido sa Thailand, kun saen namatean man an makusog na pagyugo-yugo kan linog.
Dugang pa ni De Vega naghahagagad na man nin tabang an Myanmar sa ibang nasyon nin huli ta kan nakalihis na Domingo, Marso 30, nagpakol na an numero nin mga binawian nin buhay sa labi sa 1,600 katao.
Sa sarong post sa Facebook, sinabi kan Philippine Embassy sa Yangon na padagos nindang pigsasagibo an welfare checks para sa mga apektadong Pilipino.
Nagtao man sinda nin patanid dapit sa posibleng aftershocks asin nagpahayag kan saindang kahandaan na magtao nin tabang asin suporta.
Mientrastanto, nagpa-plano an embahada na magpadara nin team sa Mandalay tangani magsagibo nin on-the-ground assessment asin direktang welfare checks.
Matao man dagos an mga ini nin mga ayuda siring kan mga mayor na pangangaipuhan asin posibleng ruta kan evacuation o repatriation.
