NAGA CITY- Arestado kan mga otoridad an apat na mga persona pigtutubudang tulak nin droga sa pigkondusir na magkakasuway na anti-illegal drug operations kan mga kapulisan sa probinsya nin Quezon.
Enot na pigkondusir an buy bust operation sa barangay Concepcion Palasan sa banwaan nin Sariaya na nagresulta sa pagkakaarestar kan mga suspetsado na sinda Reymilyn Bautista, 37-anyos asin Jessica Tumbado, 23-anyos.
Nakumpiskar sa mga ini an limang sachet na naglalaog nin pigtutubudang shabu na nagkakantidad suboot nin labi sa P5,000.
Nadakop man sa kaparehong operasyon sa barangay Malabanban Sur sa banwaan nin Candelaria an suspek na si Marvin Romano, 21-anyos asin kabale sa newly identified drug personality kan kapulisan sa nasambitang lugar.
Narekober sa suspek an sarong sachet na naglalaog nin pigtutubudang shabu.
Sa suway man na operasyon sa barangay Sta Catalina Norte sa parehong banwaan, naaktuhan man na nagpapabakal nin sachet na naglalaog nin pigtutubudang shabu an suspek na si Sandy Dizon, 46-anyos kaya tulos man ining pigdakop kan mga kapulisan.
Sa presente, nagtitinir na sa kostudiya kan mga otoridad an nasambitang mga suspetsado mantang pig-aandam naman an kasong isasangat laban sa mga ini.
