NAGA CITY– Maabot sa apat na kilo kan pigtutubudang marijuana an narekober kan mga otoridad gikan sa sarong construction worker sa Brgy. Cotta, Lucena City.
Binisto an suspek na si Kim Roales, 28-anyos.
Sa nagunong impormasyon kan Bombo Radyo Naga, napag-araman na nadakop si Roales sa lindong kan search warrant na pigsirbi kan pinagsarong pwersa kan Quezon Police Provincial Office (QPPO), Quezon Provincial Drug Enforcement Group (Q, PDEG) asin Lucena City Police Office.
Nakua sa suspek an sarong plastic eco bag na igwang laog na apat na bulto kan dahon nin marijuana na nakapatos sa packaging plastic tape asin kinakarkulong nasa apat na kilo an gabat mantang nasa labi P200,000 naman an kantidad kaini.
Sa ngunian, nagtitinir na sa kustodiya kan mga otoridad an suspek mantang pigpepreparar na an kasong pagbalgar sa RA9165 o Comprehensive Dangerous Drugs Act of 2002 na isusunad kontra sa nasambitan ng suspetsado.
