Pigtawan-duon kan sarong ekonomista na epektibo an an Pantawid Pamilyang Pilipino Program o 4Ps iyo an conditional cash assistance program kan gobyerno na pinonan kan 2007-2008, na an pangenot na katuyuhan an makatabang sa mga pamilyang nasa katiosan.
Sa intrevista kan Bombo Radyo Naga ki Dr. Emmanuel Onsay, CPA/Economist, sinabi kaini na epektibo an programa, base sa mga pag-aadal. Gayunman, igwa pa man giraray nin mga benepisyaryo na dai nakakahawas sa kahirapan huli sa magkalaen-laen na sitwasyon.
Sigon ki Onsay, kadaklan sa mga benepisyaryo napapamaray an saindang pamumuhay sa tabang kan programa. Pero may iba na nagtitios pa man giraray huli sa salang paggamit kan cash grants, arog kan pagsangla kan ATM asin paggasto kan pondo sa sugal o iba pang bisyo, na sa huri nagigin dahilan nin pagkabaon sa utang.
Dugang pa ni Onsay, mahalagang magkaigwa nin istriktong implementasyon an gobyerno sa 4Ps huli ini sarong conditional cash transfer program, na boot sabihon, may mga kondisyon na kaipuhan sundon kan mga benepisyaryo asin bako lamang sarong one-time assistance.
Pagirumdom naman ni Onsay sa mga benepisyaryo na tawan nin halaga an cash grant na saindang nahahagad, huli ta ini gikan sa pondo kan gobyerno na nagmumula sa binabayad na buwis kan mga Pilipino.
