NAGA CITY- Irido an limang persona makalihis an aksidente sa tinampo sa Brgy.Uson, Libmanan Camarines Sur.
Binisto an mga nairido na sinda Anthony Cañeza, 26 anyos,driver kan tricycle, Joy Nasayao, 32 anyos asin an tolong menor de edad.
Sa entrevista kan Bombo Radyo Naga ki PO2 Emy Rose Organis, sinaysay kaini na binabagtas ni Cañeza lunad nin tricycle an kalabaan kan nasambitan ng tinampo kan mawaran ini nin kontrol rason tanganing mabudalan an barbeque stand na nasa gilid kan tinampo kun sain presenteng nakatindog an may kagsadiri kan stall na si Nasayao asin an tolong menor de edad na nagbabakal sana sa saiyang tindahan.
Huli digdi, nagsapo nin lugad sa manlaenlaeng parte kan saindang lawas an mga persona asin tulos idinalagan sa ospital.
Sa inisyal na imbestigasyon kan mga otoridad napag aramang nandiklom an paghiling ni Cañeza huli na man sa sinasapo kaining heart problems mantang nagmamaneho kawsa tanganing mawaran ini nin kontrol. Sa ngunian, nagpapadagos pa an imbestigasyon kan mga otoridad manungod sa nasambitan ng insidente.
Meintrastanto, nagpapadagos man an pagirumdom kan Libmanan PNP sa gabos na driver na siyertuhong nasa kondisyon tuyong mamaneho nin lunadan asin magin alerto tanganing maibitaran an mga siring na insidente.
