Rollback sa presyo kan gasolina nagdadara nin paglaom asin kadikit na kaginhawahan sa mga tricycle drivers sa syudad nin Naga.
Sa intrevista kan Bombo Radyo Naga ki Romeo Briones Jr. (Easttoda President), sinaysay kaini na dakula an nagin tabang sa saindang oro-aldaw na pagbyahe kan pagbaba kan presyo kan gasolina.
Segun ki Briones na dawa nasa tahaw nin krisis, nahihiling ninda an positibong epekto kan rollback huli ta nabawasan an saindang gastos sa krudo.
Dugang pa kaini na dawa bako man dakula an natipid—kinakarkulong maabot sa cinco pesos kada litro—dakulang tabang man guiraray ini sa saindang pagbuhay.
Alagad, huli sa rollback asin tabang hale sa gobyerno, dakul sainda an nakabalik na an saindang espiritu.
Apwera sa rollback, nagpapasalamat man an mga drayber sa tabang pinansyal o ayuda na itinao kan gobyerno, sa pangengenotan kan Department of Social Welfare and Development (DSWD), siring man kan lokal na gobyerno kan Naga.
Paliwanag kaini na nakatabang sa sainda an nasabing ayuda na masimbagan an saindang pang-aro-aldaw na pangangaipo, kabale na an gasolina.
Alagad, dae suboot tulos nakaresibe nin ayuda an nagkapirang mga driver huli sa kakulangan nin mga dokumento o pagkakaiba sa saindang record. Piglinaw man kaini na pig-aayos na an mga ini asin igwa pang tsansa na maresibi ini sa masunod na distribusyon.
Mientrastanto, mantenidong agyat sa sektor an operasyon kan mga colorum tricycle na suboot nagkukua kan saindang mga pasahero.
Sa ibong kan mga angat, positibo man giraray an mga tricycle drivers. Naglalaom sinda na padagos na magbaba an presyo kan gasolina asin dagdagan pa kan gobyerno an suporta tanganing lubos sindang makabangon sa epekto kan krisis.
