NAGA CITY- Ibinuyagyag ngonyan kan National Nutrition Council Bicol na lima sa anom na probinsya sa Bicol an kabale sa mga pigtututukan kan ahensya pag-abot sa malnutrisyon.
Sigon ki Arlene Reario, nutrition program coordinator kan NNC Bicol, basado sa datos kan Philippine Plan of Action for Nutrition, lima sa mga probinsya sa kabikolan an kabale sa 36 probinsya sa nasyon na tututukan sa ngonyan hasta sa taong 2022.
Napag-araman na an probinsya nin Catanduanes an nangengenot sa bilog na nasyon pag-abot sa halangkaw na numero nin kaso nin ‘stunted’ o an bagulbol na pagdakula nin sarong tao na indikasyon nin malnutrisyon.
Mientrastanto, sa nasambitang rehiyon, solamenteng an probinsya sana nin Sorsogon an dae nakabale sa datos na igwang halangkaw na numero kan malnutrisyon.
Sa ngonyan, pigsierto man kan ahensya na mas papahiguton ninda an mga programa laban sa malnutrisyon sa nasambitang mga probinsya.
