Dai uyon an sarong opisyal kan Barangay sa pagpapaoktaba kan masunod na election huli sa posibleng extension sa pagserbi kan mga Barangay Officials.
Sa intrevista kan Bombo Radyo Naga ki Alvin Pajarin- Barangay Kagawad kan San Roque, Calabanga Camarines Sur, sinabi kaini na kun pag-uurulayan an pribilehiyo o derechos sa pagboto kan lambang saro, dai ini uyon sa pagpaoktaba kan Barangay and Sangguniang Kabataan Elections na nakataalan kuta na ngunian na bulan nin Nobyembre 2026.
Segun digdi, hinahalian nin karapatan na makapagboto an mga namamanwaan enkaso maaprubaran ini. Marurumduman na kasuudma, aldaw ni Lunes Setyembe 14, 2026 kan aprubaran kan Senado sa ikatolong pagbasa an limang (5) taon na termino kan mga opisyales kan Barangay asin Sangguniang Kabataan.
Mientrastanto, dagdag pa ni Pajarin, kun pag-uurulayan man an Contingency Plan, mapabor man ini sa mga incumbent Barangay Officials huli maipapadagos an mga napunan nang proyekto ka konseho.
Kinumpirmar ni Pajarin na kulang an tolong (3) taon tanganing maiimplementar an mga proyektong mawot na maisagibo sa sarong Barangay kan mga incumbent officials asin alagad, kaipuhan magsunod ka konseho sa anu man na ipapautob na batas kan mga lehislador.
Dugang pa ni Pajarin, positibo asin negatibo an posibleng mangyari enkaso dagusan ng maipautob an limang taon na termino kan mga opisyales kan Barangay sa ibong kan pagpabor sa mga incumbent Barangay Officials kan limang taon na termino, dai naman an mga ini liwat na makakapagkandidato sa masunod na election huli ta tatawanan na nin tsansa an mga masunod na nagmamawot man na magserbi sa lambang Barangay sa masunod na pirilian.
