Pigkakarkulong maabot sa 500 na personahes kan Camarines Sur Police Provincial Office (CSPPO) an pig-aandam na i-deploy bilang augmentation force sa maabot na Peñafrancia Festival ngani na masiguro an seguridad asin orden durante kan mga aktibidad.
Sa intrevista kan Bombo Radyo Naga ki Police Major Monica San Juan, tagapagtaram kan CSPPO, mabilog an opisina nin sub-task groups para sa seguridad, peace and order, asin emergency preparedness and response. An saindang mga trabaho kabali an pagmanehar kan trapiko asin seguridad sa panahon kan mga mayor na aktibidad kan kapiyestahan.
Parte man kan preparasyon an pag-alokar nin mga tawohan para sa seguridad durante kan mga aktibidad, kabali an mga prusisyon asin iba pang mga aktibidad na inatenderan nin kadakol na mga deboto asin turista. Makikoordinar man an CSPPO sa Ciudad nin Naga asin iba pang mga katuwang na ahensya.
Sinabi pa ni San Juan na kabale sa mga angat iyo an dakul na tawo asin posibleng pag-uran durante kan aktibidades. Naka-standby man an mga personahes tanganing magresponde sa mga insidente nin kasulo asin iba pang emerhensya, sa pakikipagtabangan kan mga lokal na gobyerno asin kan MDRRMO.
Nangapudan an CSPPO sa mga deboto asin turista na magkooperar, magsunod sa mga guidelines na ipapautob, asin mantiniron an marhay na gawe-gawe para sa ligtas, matoninong, asin areglado na selebrasyon kan Peñafrancia Festival. Lininaw na pwedeng magbago an bilang na 500 depende sa pangangaipo asin final deployment plan.
