Nagtugot an International Criminal Court (ICC) sa 539 na soboot biktima kan kampanya kontra droga kan administrasyon ni dating Presidente Rodrigo Duterte na magpartisipar sa mga pagdangog na may relasyon sa kaso nin mga krimen laban sa katawohan laban sa dating presidente.
Sa ipinaluwas na Q&A kan ICC, sinabi kan korte na kabali sa mga partisipantes an mga pamilya kan mga nagadan sa kampanya kontra droga. Pignombrahan man kan mga huwes si Atty. Joel Butuyan asin Atty. Gilbert Andres, kauban si Atty. Paolina Massidda, tanganing magsirbe bilang sarong legal representation group para sa mga biktima.
Kan Abril 23, kinumpirmar kan ICC Pre-Trial Chamber an tolong akusasyon laban ki Duterte na may relasyon sa mga panggagadan sa panahon na siya bilang alkalde kan Davao City asin kan huri bilang presidente. Kabali sa mga nabistong biktima sa kaso iyo an 17 anyos na si Kian delos Santos.
Si Duterte piglalaoman na matindog sa kaso susog sa Artikulo 63 kan Rome Statute, na naghahagad na an mga akusado yaon sa pagbista.
Mientrastanto, inapod kan ICC Office of the Prosecutor an kumpirmasyon kan mga akusasyon na sarong “significant milestone” pasiring sa accountability para sa mga biktima kan soboot extrajudicial killings.
Idinoon man kaini na padagos nindang isulong an hustisya asin sisiguraduhon an marikas na paninimbagan.
Magigirumdoman na kan Abril 22, an ICC Appeals Chamber nagsuportar kan hurisdiksyon kan korte sa kaso, sa ibong kan pagtumang kan kampo kan dating presidente base sa paghale kan Pilipinas sa Rome Statute kan 2019.
Ikinaogma kan Amnesty International sa Pilipinas an desisyon na inaapod ining haloy nang pighahalat na lakdang pasiring sa hustisya para sa mga biktima. Susog ki Ritz Lee Santos III, ini “sarong makasaysayan na momento” na nagpapahiling na an “lakop asin sistematikong paggadan bilang krimen laban sa katawohan” pwedeng panimbagon.
Dugang pa kaini, pigtatampok man kan kaso an hiwas kan mga garadanan sa irarom kan kampanya kontra droga asin an soboot kawaran nin mga lokal na institusyon tanganing panimbagon an mga responsable.
