NAGA CITY- Matrayumpo na pigkundusir an Via Crusis sa banwaan nin Lagonoy, Camarines Sur kun saen pigkakarkulong nag-aabot sa 5,000 an mga deboto na nakisumaro digdi.
Sa entrevista kan Bombo Radyo Naga ki Rev. Fr. Anthony Sargento, Parochial Vicar kan Parish of St. Phillip and James the Apostles, pigkakarkulong nag-abot sa 5,000 na mga deboto an nakisumaro sa haros tolong kilometrong prusisyon na nagpoon sa barangay San Isidro Norte asin nagtapos sa bukid sa parte kan barangay Agosais.
Riribayan suboot na pigbubuhat kan 30 persona hale sa manlaen laeng mga organisasyon an krus na gibo sa kawayan na pigkakarkulong nasa 30-piye an laba.
Alas-2 nin hapon nagpoon an nasambitang prusisyon kun saen naghaloy ini nin haros tolong oras huli ta kinakaipuhan pang magbalyo sa salog asin magsakat sa bukid an mga deboto na nag-iba digdi.
Mientrastanto, sigon ki Rev. Fr. Sargento, nagpuon an nasambitang tradisyon 18 taon na an nakakaagi na pinunan kan dating kura paruko kan nasambitang parokya.
