NAGA CITY- Sibot ngonyan an Provincial Disaster Risk Reduction and Management Office (PDRRMO) sa probinsya nin Camarines Sur sa pananao nin mga face mask sa mga residente kan Rinconada area o an ikalimang distrito kan probinsya.
Pasado ala-1 subago kan magpuon na maapektaran an mga banwaan nin Nabua, Bula, Bato, Buhi asin Balatan kan ash fall hale sa Bulkang Mayon sa probinsya nin Albay.
Subago, sinuspendir ni Gov. Migz Villafuerte an klase sa gabos na lebel sa bilog na 5th district hasta saaga, aldaw nin Martes asin tulos man na nagkondusir nin Rinconada Mayon alert meeting.
Sigon ki Che Bermeo, head kan PDRRMO-CamSur, naghagad na sinda nin tabang sa Bureau of Fire Protection (BFP) para malinigan an mga tinampo na apektado kan makapal na abo.
Pigpapalikay man kan nasambitang ahensya an mga byahero urog na ta apektado naman an visibility sa mga tinampo.
