Nagpuli na sa nasyon kan nakalihis na Sabado an 64 South Koreans na na-detine sa Cambodia huli sa soboot pagkakaimbwelto sa mga operasyon kan online scam, sigun sa mga awtoridad kan South Korea.
An saindang pagbabalik an kasunod kan paggadan sa sarong South Korean na estudyante sa kolehiyo kan nakalihis na Agosto, na pinagtutubudang biktima kan employment scam sa Cambodia.
Pag abot ninda sa Incheon Airport sa Seoul, nagkapira sa mga pinapuli iyo an nakasulot nin kalo asin mga maskara, asin may mga posas na tinakupan nin tela mantang pig iibahan kan mga pulis.
Kansuarin sana nagluwas an gobyerno kan South Korea nin “code-black” travel ban sa nagkapirang parte kan Cambodia asin man nagpadara nin mga opisyal tangani sana tabangan an mga kahimanwa kaining naloko asin napiritang magtrabaho sa mga scam compound.
Pigkakarkulong labi sa 1,000 South Koreans an kabali sa poco mas o menos 200,000 katao gikan sa manlaen-laeng nasyon na naiimbwelto sa mga scam operations sa Cambodia, sigun sa National Security Adviser na si Wi Sung-lac.
Pinagsugo na man ni President Lee Jae Myung an tulos na paghali kan mga iligal na online job ads bako sana sa Cambodia kundi sa bilog na South East Asian tangani man malikayang malinlang an mga residentes.
Basado sa United Nations, an mga scam center sa South East Asian an nagkikita nin bilyun-bilyong dolyar kada taon gikan sa mga online asin man phone scam na biktima an mga tao sa manlaen-laeng panig kan kinaban.
