Aram baya nindo mga ka-bombo, an Madhya Pradesh Government kan Central India kasuarin sana pigsuspender an pitong engineers huli sa salang desinyo kan nasa 200 million rupee o $2.3 million na tulay na igwang 90-degree turn.
An bagong tulay na ini sa Bhopal an enot nang pig-anunsyar haros sampulong taon na an nakakalihis asin kinaipuhan kan estado ka Madhya Pradesh nin nasa 200 million rupees tanganing makumpleto.
Obheto kaini na mapamarhay an dalan sa pag-ultanan kan Mahamai Ka Bagh, Pushpa Nagar, asin kan station area kan New Bhopal.
Alagad kadakol an nagkuriyat na ladawan na nagin viral sa social media huli sa salang desinyo kan tulay na peligroso para sa mga motorista o maagi digde.
Huli sa kontrobersiya, pig-anunsyar ni Chief Minister Mohan Yadav an suspension kan pitong engineers na imbwelto sa desinyo makalihis an ginibong imbestigasyon.
An design consultant asin an architect firm na imbwelto sa konstruksyon kan tulay an pigsasabing blacklisted na kan lokal na gobierno.
Mientrastanto, pigsaysay man kan chief engineer kan proyekto na mayo soboot choice an saiyang team kundi gibuhon an pig-aapod na 90-degree turn huli sa limitadong espasyo kan daga asin presensiya kan metro station na harani digde.
Pigsuhestyon man kan otoridad sa Bhopal an pagbakal nin dugang na daga tanganing ma-implementar an mas salbadong tulay para sa mga namamanwaan kan lugar.
Sa ngunyan, padagos na nagigin sentro kan pag-urulay an tulay huli sa mahal na kantedad kaini alagad bakong marhay an nagin resulta.
