NAGA CITY- Arestado kan mga otoridad an pitong persona makalihis an pigkondusir na one time big time drug operation kan Philippine National Police sa limang mga banwaan sa probinsya nin Camarines Norte.
Sa nagunong impormasyon kan Bombo Radyo Naga, napag-araman na pigkondusir an anti-illegal drug operations sa banwaan nin Jose Panganiban, Labo, Mercedes, Talisay asin Vinzons kan mga kapulisan asin kan Philippine Drug Enforcement Agency (PDEA).
Nakumpiskar kan mga otoridad sa pitong mga suspek an 28 sachet na naglalaog nin pigtutubudang shabu, sarong sachet nin alang na dahon nin marijuana asin mga drug paraphernalia.
Nagtitinir na ngonyan sa kostudiya kan mga otoridad an nasambitang mga suspek mantang inaandam na an kasong isasangat laban sa mga ini.
An nasambitang operasyon kan kapulisan parte kan piglunsar kan PNP na Oplan Double Barrel Reloaded.
