Napauktaba an pagbwelta sa Manila kan Philippine Airlines Flight 2988 gikan sa Tacloban Airport kun saen kadaklan sa mga pasahero an mga kongresista na nag-atender sa Bagong Pilipinas Serbisyo Fair (BPSF) makalihis na an sarong 80 anyos na kapwa pasahero an magbomb joke.
Sa presente, pig-iimbestigaran na kan mga otoridad an 80 anyos na babae na nagjoke sa PAL flight attendant asin pigsaysay na igwang bomba na masabog.
Tolos na ipinaaram kan nasambitan ng steward an bomb joke sa saiyang supervsior rason tanganing i-hold an boarding kan byahe.
An mga kongresista na lunad kan PAL Flight 2988 an presente nang nasa laog kan eroplano mantang pigtatapos an boarding process para sa iba pang pasahero kan gibuhon an bomb joke.
Komo standard operating procedure sa siring na insidente, pinababa an gabos kan pasahero asin pig-utro an inspection sa eroplano magin sa gabos kan mga bagahe.Duwang K9 dogs an pigdeploy kan airport security tanganing surion an mga bagahe kan mga pasahero.
Labi duwang oras an pigkawsa na delay kan nasambitan ng joke kan senior citizen na dae na pinasakay nin eroplano asin presenteng pig-iimbestigaran.
Sigun sa Civil Aviation Authority of the Philippines na nasa 70 kongresista an lunad kan nasambitan ng flight.
Kan masierto na salbado na an gabos asin mayong katotoohan an bomb threat, pigpadagos na an byahe pabalik nin Manila.
