Linalaoman na mapakol sa pitong milyon na tawo an madagsa sa pagbisita ni Pope Leo XIV sa Argentina sa Nobyembre—an kainot-inoteng pagbisita nin Santo Papa sa nasyon sa laog kan haros apat na dekada.
Segun sa gobyerno kan Argentina kan Lunes, an pinakahuring pagbisita nin sarong Santo Papa sa tradisyunal na Katolikong nasyon kan 1987 pa.
Si Pope Francis, na taga-Argentina, dai nakabalik sa saiyang sadiring nasyon durante kan saiyang pontificate.
An US-born na si Pope Leo XIV nakatakda man na magbisita sa Uruguay asin Peru bilang parte kan naturang apostolic trip.
Sa Argentina, masagibo an Santo Papa nin tolong open-air Mass asin iba pang religious gatherings sa Buenos Aires asin sa Cordoba province sa laog nin apat na aldaw, segun sa itinerary na ipinaluwas kan Vatican.
Huli sa inaasahan na kadakol kan mga tawo, naghahanda an Argentina para sa pinakadakulang security operation sa kasaysayan kan bansa.
Segun ki Security Minister Alejandra Monteoliva, mabantay an mga pwersang panseguridad sa tolong hurisdiksyon, tolong airport, 11 closed-venue events asin tolong darakulang mass gatherings.
Pinag-aadalan man kan gobyerno an pagdeklara nin special non-working days o national holidays tanganing mapadali an pagbiyahe kan mga deboto.
Nakatakda na makipagmiting si Pope Leo ki President Javier Milei pag-abot kaini sa Buenos Aires sa Nobyembre 8, pati na man sa mga representante kan civil society.
