Ipinahayag kan Philippine National Police (PNP) na nasa 26 nang badil an isinuko na konektado ki Senador Ronald “Bato” dela Rosa, ini kasunod kan pagbawi kan PNP sa saiyang gun license asin mga firearm registration.
Segun ki PNP Public Information Office chief Col. Allen Rae Co, 20 armas an isinuko sa Davao mantang anom man an na-turn over sa Region 4, kaya nag-abot na sa 26 an nasa kustodiya kan pulisya.
Minsan siring, 91 sa kabilugan na 117 firearms na nakarehistro sa pangaran ni Dela Rosa an dai pa na-account.
Padagos man suboot na nakikipag-ugnayan an PNP Firearms and Explosives Office (FEO) sa pamilya kan Senador para sa pagsuko kan mga natatadang armas, asin posible man na magsagibo nin legal na aksyon an pulisya para makua an mga ini.
Padagos man an operasyon kan PNP para hanapon si Dela Rosa asin ipatupad an arrest warrant laban saiya.
Dai ibinunyag kan pulisya an saiyang huring kinamumugtakan huli ta posibleng ikapeligro kaini an operasyon.
Segun sa pinakahuring impormasyon kan PNP, nagtutukaw pa man giraray sa Pilipinas an Senador.
Si Dela Rosa an hinahanap konektado sa arrest warrant kan International Criminal Court (ICC) sa imbestigasyon kaini sa suboot na crimes against humanity na may relasyon sa drug war kan administrasyon ni dating Presidente Rodrigo Duterte.
