Pwedeng umabot sa haros duwang taon o labi pa an paglilitis kan International Criminal Court (ICC) ki dating Presidente Rodrigo Duterte.
An nasabing trial nakatalaan na magpuon sa Nobyembre 30, labi 20 bulan poon kan naaresto an dating presidente digdi sa Pilipinas.
Segun ki ICC-accredited lawyer, Atty. Gilbert Andres, pwedeng mas mapaikli o mas mapahalaba an trial depende sa takbo kan mga pagdangog asin sa rikas kan pagpresentar o pagpahiling kan mga testigo asin kan mga ebidensyang inandam kan magkabalyong lado.
Si Atty. Andres saro sa mga common legal representative kan mga biktima kan drug war kan nagtalikod na administrasyon, asin segun saiya, importante an naging desisyon kan international tribunal na obligahon an dating presidente na humarap mismo sa paglilitis.
Nilalaoman man na nagkapirang kaanak kan mga biktima an personal na masubaybay sa mga serye kan pagdangog na gigibuhon sa The Hague, an headquarters kan ICC.
Segun ki Atty. Andres, saro sana an klase kan international crime na kinakaharap kan dating presidente kan Pilipinas kaya mas simple an kasong ini kumpara sa iba pang mga kasong nakaputan na dati kan international tribunal.
Mantang, kaiba kan pagpuon kan trial sa Nobyembre 30, inaasahan na tulos babasahan nin confirmed charges asin hihingahon nin plea an dating presidente kan Pilipinas.
Susundan ini kan opening statements kan prosecution, kan legal representatives kan mga biktima kan drug war, asin kan defense team kan dating presidente.
Masunod digdi an pagpresentar kan prosecution sa saindang enot na limang testigo poon Nobyembre 30 sagkod Disyembre 18, 2026.
