NAGA CITY- Mga drug surrenderees asin sarong pulis an nagserbeng disipulo ngonyan na taon sa sarong simbahan asin hinugasan pa nin sarong padi an saindang mga bitis sa ciudad nin Naga.
Sa entrevista kan Bombo Radyo Naga ki PC/Insp. Marlon Antang, an station commander kan Naga City Police Office (NCPO) Station 4, sinaysay kaini na mismong si Fr. Hans Michael Borbor, an parish priest kan sarong simbahan sa barangay Cararayan sa naambitang ciudad an mawot na siya asin an 11 mga surrenderees an magserbeng disipulo ngonyan na taon.
An ‘Washing of the feet’ o an paghuhugas nin bitis kan 11 mga drug personalities, sarong pagpapahiling sa paghugas kan saindang mga kasalan asin an dagos na nindang pagtaliko sa transaksyon nin iligal na droga.
Sigon ki Antang, ikinaugma kan 11 dae na pinangaranan pang mga surrenderees an nasambitang aktibidad huli naman ta nagkaigwa suboot nin pagbabago sa saindang buhay.
Mientrastanto, rinibo man an mga deboto na nagpartisipar sa pigkondusir na Alay-Lakad pasiring sa kapilya ni Amang Hinulid sa banwaan nin Calabanga, Camarines Sur.
Kabale sa mga deboto na nagpartisipar sa aktibidad si Naga City Mayor John Bongat asin an saiyang esposa na si Farah Bongat.
Kadakol man an mga deboto na nakisumaro sa prusisyon kan labi sa 12 mga santo sa banwaan nin Gainza sa parehong probinsya.
