NAGA CITY- Nagtutubod si Sen. Bam Aquino na dae masasayang an nagastos kan Commission on Election (Comelec) sa naenot na kaining preparasyon para sa barangay asin SK Elections para kuta na ngonyan na taon.
Sigon ki Aquino, magagamit pa an mga nabakal na materyales kan Comelec para sa ikokondusir na eleksyon sa Mayo 2018 kaya dae masasayang an saindang mga gastos.
Mientrastanto, tinawan doon ni Aquino na dapat an tao an magpili kan mga mamamayo sa saindang lugar kaya mahigot nindang pigkontra an planong pag-appoint na sana ni presidente Rodrigo Duterte sa mga barangay asin SK officials sa bilog na nasyon.
Katakod kaini, magkakaigwa nin holdover capacity an mga incumbent barangay officials hasta sa Mayo 2018.
Hinahalat na sana ngonyan ni Aquino an magiging desisyon kan Bicameral Committee para maaraman an pinal na bersyon kan nasabitang propwestong ley.
