NAGA CITY – Bako na suboot bago an mga insidente nin pambabadil sa Las Vegas, Nevada huli sa kadakol na tao na nagbibisita digdi.
Ini an kinumpirmar ni Sunday Arcilla, sarong Overseas Filipino Worker (OFW) na presenteng nagtitinir sa Las Vegas sa entrevista kan Bombo Radyo Naga.
Sigon saiya, nagtatrabaho siya sa kataid na edificio kan Mandalay Bay Hotel kan bigla na sana niyang madangog an sunod sunod na putok nin badil.
Sigon ki Arcilla, huli sa dakol nin mga tao na nagpapasiring sa Las Vegas strip aru-aldaw, haros normal na digdi an mga kariribukan.
Mientrastanto, sigon ki Arcilla, pano naman an mga ospital sa lugar nin mga taong nairido makalihis an nangyaring pambabadil sa lugar kan suspek na si Stephen Paddock.
Padagos pa suboot an pagbulos kan tabang hale sa mga indibidwal na mawot na magdonar nin dugo sa mga nabiktima kan mass shooting.
Mas pinahigot man suboot sa ngonyan kan mga otoridad an pigpapautob na seguridad sa Las Vegas para masierto na dae na mauutro an makangirhat na insidente.
