NAGA CITY- Pormal nang binukasan an Kamundagan Festival 2017 sa ciudad nin Naga o an panahon kan kamundagan ni Hesus.
Pinakintab an programa kan manlaen laeng mga makokolor na Christmas lights asin dekorasyon sa Plaza Quezon siring man sa kasentrohan kan Naga.
Alas 4:00 nin hapon kan magpuon an Kirikiti street parade kun saen apwera sa sulot na mga costume, bitbit man kan mga aking nagpartisipar hale sa 10 barangay sa ciudad an mga nag-iilaw na props arog na sana nin snow ball asin mga bituon.
Nagpasiklaban an mga kaakian sa saindang street dance kun saen pignumbrahan komo ganador an partisipante hale sa Barangay Bagumbayan Sur na nakaresibe nin P100,000; 2nd place an Barangay Sta. Cruz na igwa nin P75,000 asin 3rd place man an Barangay Dinaga na igwa nin P50,000.
Niruso man kan kadakol na tao an plaza kun saen pinailaw an Christmas tree na napapalibutan nin dekorasyon na mga Christmas lights asin bituon.
Mas pinaliwanag man an bilog na lugar huli sa mga makikintab na dekorasyon sa mga poon nin kahoy asin dakulang imahe kan nativity scene.
Pinakamagayon sa gabos an kolor berdeng stage na pinano nin mga Christmas lights asin mga dekorasyon arog kan poinsettia asin Christmas balls.
Nagtapos an programa sa paagi nin fireworks display na saro sa mga highlights kan aktibidad.
Nilalaoman na madara nin kaugmahan sa mga Nagueños an Kamundagan Festival na mahaloy sa bilog na bulan nin Disyembre.
