NAGA CITY- Labi sa sarong taon pa antes an masunod na eleksyon, pormal nang pig-anunsyar ni Camarines Sur First District Rep. Rolando ‘Nonoy’ Andaya an saiyang plano na magdalagan komo gobernador sa probinsya sa maabot na pirilian.
Sa sarong pahayag na ginibo kan dating Department of Budget and Management (DBM) Secretary, sinaysay kaini na mayo nang atrasan an saiyang plano na magdalagan komo gobernador kan probinsya.
Dara kan saiyang labing pagmamakulog suboot sa mga namamanwaan kaya nagdesisyon siya na na magdalagan komo gobernador.
Tinawan doon man ni Andaya na para sa interes kan kadaklan asin kan bilog na probinsya an saiyang planong pagdaagan sa eleksyon kaya man hagad niya na suportaran kan publiko an saiyang kandidatura.
Mientrastanto, sigon man ki Camarines Sur fourth district Rep. Noli Fuentebella, haloy na suboot nindang napag-oorolayan an nasambitang plano asin nagtutubod siya na si Andaya na suboot an makakapagdara nin totoong pagbabago sa Camarines Sur.
Sa ngonyan, si Governor Miguel Luiz ‘Migz’ Villafuerte an nakatukaw komo gobernador kan probinsya.
