Pinagkuwestiyon ni Senador-Hukom Joel Villanueva kun paano nakarekord nin sobra P150 milyon na benta kan 2024 an Cale88 Foods Corp., sarong exporter nin banana chips na pig-uugnay sa negosyo ni Manases Carpio, agom ni Bise Presidente Sara Duterte, maski mayo ining idineklarang empleyado sa General Information Sheet kaini para sa nasabing taon.
Sa impeachment trial kaining Biyernes, Oktubre 9, sinambit ni Villanueva an P150.76 milyong benta asin P6.13 milyong pagkalugi kan kumpanya kan 2024. Segun sa testigo kan BIR na si ATTY Anne Lorraine Garcia-Marquez, nakasurat sa financial statements kaini an gastos sa direct labor asin sahod, alagad mayo nin detalye sa bilang kan mga manggagawa o kontratista.
Kinwestyon man kan Senator an mga dokumentong nagsusuporta sa foreign transactions kan kumpanya, kabali an sales invoices, shipping records, asin logistics costs. Sinabi ni Garcia-Marquez na igwa siya nin audited financial statements asin income tax return, alagad mayo an mga kaapil na invoice asin iba pang supporting documents.
Naenot nang nagluwas sa AMLC report na nakaresibe an Cale88 nin kabilugan na P319.2 milyong inward remittances hale sa China poon 2022 sagkod 2025. Kan haputon kun paano napondohan an operasyon sa ibong kan pagkalugi, sinabi kan testigo kan BIR na nakasurat sa financial statements an pangako nin padagos na suportang pinansyal hale sa management o mga kagsadiri.
Idinugang ni Villanueva na gusto niyang maaraman kun igwa nin supisyenteng manggagawa, supplier, asin aktuwal na produksyon na masusuporta sa pigreport na benta asin foreign transactions. Lininaw niya na bako pa niyang konklusyon na fictitious an operasyon, alagad sabi niya, nakakabahala an mga impormasyong nagluwas.
