NAGA CITY-Pinara ngonyan kan Department of Environment and Natural Resources (DENR) siring man kan Municipal Disaster Risk Reduction and Management Office (MDRRMO) sa banwaan nin Dolores, Quezon an paghandal kan publiko manungod sa paglakop nin kalayo hale sa grass fire sa parte kan Mt. Banahaw.
Sa ekslusibong entrevista kan Bombo Radyo Naga ki Randy Matibag, pamayo kan MDRRMO-Dolores, sinaysay kaini na ala-1 nin hapon suodma kan magpuon an kalayo sa parte kan Mt. Masalokot sa boundary kan saindang banwaan asin kan Candelaria sa nasambitang probinsya.
Kontrolado na suboot an kasulo huli ta marikas man na nagresponde digdi an mga kabuhan kan Bureau of Fire Protection (BFP) para masierto na dae malakop an kalayo sa mga pagtaraid kaining bundok asin sa mas dakulang parte kan Mt. Banahaw.
Sa suway man na entrevista ki Magtanggol Barrion, park maintenance foreman kan DENR, dae man suboot nagdara nin pagkaalarma sa publiko an pangyayari huli ta taon-taon suboot nagkakaigwa nin grass fire sa sadit na parte kan Mt. Masalokot.
An Mt Masalokot saro suboot na sadit na bundok sa ibaba kan Mt. Banahaw na mahihiling sa probinsya nin Quezon.
Pigsierto man ni Barrion na magkakaigwa an saindang opisina nin maninigong imbestigasyon sa pangyayari urog pa ta saro suboot ining pagbalgar sa ley.
