NAGA CITY- Kinumpirmar ngonian kan San Andres-PNP na Bicolana an agom kan suspek na nanaga-gadan sa saiyang mag-iina sa Sitio Tinimbawan, Barangay Calunacon, San Andres, Romblon.
San entrevista kan Bombo Radyo Naga ki P/Senior Insp. Edwin Bautista, chief of police kan San Andres-PNP sa Romblon, sinaysay kaini na tubong Bicol an saro sa mga biktima na si Mylene Talangan, 31-anyos, live-in partner kan suspek.
Apwera digdi, taga-Bicol man suboot an ina kan suspek na si Michael Forlaje Falceso, 33-anyos mantang taga-Romblon man an ama kaini.
Alagad sa ngonian, dae pa suboot masusuog kan mga ini kun sain na probinsya sa Bicol an mga kaparientes kan nasambitan ng mga biktima.
Napag-araman na taon 2014 sana kan maisipan kan nasambitan nang suspek na dagos nang magtinir sa Romblon kun sain digdi na ini nakaagom asin nagka-igwa nin sadiring pamilya.
Apwera digdi, segun ki Bautista, pigtutubudan man na igwang deperensya sa pag-iisip an suspek antes pa an nasambitan nang makangirhat na pangyayari.
Naririparo kaya suboot kan mga kataraid harong kan suspek na nagngingirit ining solo asin pirmi na sanang naaanggot dawa sa mga simpleng bagay.
Kun marurumduman, pinagtataga kan suspek an saiyang mag-iina makalihis magka-igwa nin dae pagkakasinabutan an mag-agom.
Segun pa sa hepe, tulos na nagresponde sa lugar an mga kapulisan kaibanan an mga barangay officials tangani na arestaron an suspek alagad sinugod suboot sinda kaini nin sundang.
Huli digdi, pinaputukan kan mga otoridad an suspek kun sain nagsapo ini nin lugad sa saiyang tulak na tulos man na idinalagan sa ospital alagad ideneklarar na ining dead on arrival kan mga doktor.
