NAGA CITY- Nakatalaan na magsumiter nin motion for reconsideration (MR) an lokal na gobyerno kan ciudad nin Naga sa Supreme Court en banc katakod sa desisyon kan korte na dagos na bakantehon kaini an dagang kinatitindugan kan City Hall.
Ini igwang koneksyon sa kasong pigsangat kan pamilya Mariano kan taong 2003 na nagsasabing sinda an totoong may sadiri kan limang hektaryang daga kun saen makukua an City Hall Compound.
Makalihis na maisangat sa Korte Suprema an nasambitang kaso, napatotoohan suboot kan nasambitang pamilya na sainda an daga sa paagi kan mga ebidensya kun kaya pinaburan ini kan Supreme Court.
Huli digdi, kinakaipuhan na suboot kan ciudad na magbayad nin kabilugang kantidad na maabot sa P255 milyon komo arkila sa nasambitang daga na nagpoon pa kan 2003 hasta sa presenteng taon.
Alagad, nanindugan si Naga City Mayor John Bongat na anuman an mangyari, dae suboot ninda iwawalat an nasambitang lugar.
Sa ibong kaini, aminado man si Bongat na mayong dakulang kwarta an ciudad na pambayad kun kaya iaagi na sana suboot ninda sa legal na lakdang an orolay.
