Nagadan 139 katawo, kaiba an 15 aki matapos maglubog an sarong bangka na may sakay na labing 300 pasahero sa baybayon kan Djibouti , susog sa report kan International Organization for Migration (IOM) kan United Nations.
Nangyari an insidente sa pag-ultanan kan Huwebes nin banggi asin Biyernes nin amay na aga sa Dagat kan Aden mantang pasiring an bangka sa nasyon kan Yemen hale sa Djibouti.
Puro mga mamamayan kan Ethiopia an labing 80 nakaligtas sa nasabing pagkalunod kan barko, mantang padagos pa an paghanap asin pagligtas kan mga awtoridad kan Djibouti sa 84 na nawawara pa.
Segun sa IOM, an trahedyang ini nagpapagirumdom giraray sa grabeng peligro na inaatubang kan mga migrante na naghahanap sana nin trabaho asin mas ligtas na pamumuhay sa Gitnang Silangan.
Padagos an pagtabang kan mga rescue team sa mga nakaligtas asin an pagpapakusog kan mga lakdang tanganing malikayan an bagong aksidente sa nasabing ruta.
