NAGA CITY- Pinahimutikan ngonyan kan Provincial Disater Risk Reduction and Management Office (PDRRMO) Camarines Sur an naglakop na impormasyon na igwa suboot nagkapirang edificio sa banwaan nin Libmanan an nagkaigwa nin gatak makalihis an nagtamang magnitude 6.0 na linog sa Pandan, Catanduanes kan nakaaging Sabado kun saen namatean man an pagyugo kaini sa probinsya.
Sa entrevista kan Bombo Radyo Naga ki Chris Rivero, assistant head kan PDRRMO-Camarines Sur, sinaysay kaini na mayong naresibe an saindang opisina nin impormasyon na igwang edificio an nadanyaran makalihis an nasambitang makusog na linog.
Posible suboot na iba an rason kun tano nagkaigwa nin gatak sa salog an sarong harong sa banwaan nin Libmanan.
Mientrastanto, sa suway man na pakikipag-olay ki PDRRMO-Camarines Sur head Che Bermeo, sinaysay kaini na basado sa saindang pigkondusir na validation, nagluluwas na ‘fake news’ an nasambitang post sa social media asin tulos man ining pighale kan netizen.
Pigsierto man kan PDRRMO na nakaandam an saindang opisina sa kalamidad na posibleng magtama sa probinsya asin nakalatag naman an saindang contingency plan para digdi.
