NAGA CITY- Napagdesisyunan kan Peace and Order Council (POC) sa ciudad nin Naga na ideklarar komo ‘persona non-grata’ si dating Naga City Coun. Luis Ortega na nagsabing langkaba an droga sa ciudad asin imbwelto sa illegal drug trade an bayaw ni Vice President Leni Robredo.
Sa entrevista kan Bombo Radyo Naga ki dating Naga City Coun. Jose Tuason, sinaysay kaini na inirekomendar ninda sa pigkondusir na POC meeting na ideklarar na persona non-grata si Ortega huli sa sahot na pigdadaklag kaini sa ciudad.
Basehan suboot sa saindang deklarasyon an mga press conference na ginibo ni Ortega asin an pahayag kan nagkapirang testigo katakod kan naenot na kaining mga sahot na langkaba an droga sa ciudad asin imbwelto si Butch Robredo an bayaw kan bise presidente sa illegal drug trade.
Sigon ki Tuason, unanimous an nagin desisyon kan POC sa saindang resolusyon na nakatalaan na isumiter sa opisina ni Naga City Mayor John Bongat para mapapusog.
Tinawan doon kan dating konsehal, an lakdang na ini kan grupo kan dating mga pulis sa ciudad para maprotehiran an imahe kan Naga City.
Mientrastanto, pinurbaran man kuanon kan Bombo Radyo Naga an lado ni Ortega alagad presenteng yaon ini sa nasyong Brunei.
