(UPDATE) NAGA CITY- Ikinaalarma kan alkalde kan banwaan nin Buhi, Camarines Sur an nahiling na gatak suboot sa bukid sa landslide area sa parte kan Barangay Ipil.
Sa entrevista kan Bombo Radyo Naga sinaysay ni Buhi Mayor Margie Aguinillo na naalarma sinda kan maaraman an manungod sa gatak sa landslide area sa nasambitang Barangay kun kaya nagdesisyon sinda na iebakwar an haros 1,000 katao na nakaistar sa lugar.
Pigsierto man kan alkalde na naghahanap sinda ngonyan nin relocation site na harani sana sa Lake Buhi para dae na magbwelta pa an mga iebakwar na residente sa Barangay Ipil.
Mientrastanto, sa ngonyan 130 pamilya na sana an nagtitinir sa sarong evacuation center sa nasambitang banwaan makalihis na mag-decamp na an iba sa mga nag-ebakwar na residente.
