Aram baya nindo mga ka-Bombo, nakilhag asin namangha an kadakol na tawo sa Europa sa nanutaran nindang misteryosong liwanag sa kalangitan na nag-iiba pa nin hugis antes nawara makalihis an pirang minuto.
Kaabali an mga residente sa Billingborough, United Kingdom sa mga nakahiling sa misteryosong liwanag na naghaloy nin 12 minuto sa kalangitan antes nawara. Haloy sana an paghiro kan liwanag na mas dakula sa ordinaryong aircraft an sukol.
Mantang naghahaloy, nagbabago an anyo kan liwanag na gikan sa pagiging oval, nagin garo hugis paruparo, asin pagkatapos an naging spiral.
Nanutaran man ini sa iba pang parte kan United Kingdom, pati sa Sweden, Croatia, asin mga kataraid na lugar. Kasunod kaini, nagluwasan nin manlaen-laen na paghuna an mga tawo dapit sa saindang nanutaran.
An iba, nagtubod liwat na sa aliens an liwanag.
Alagad paliwanag kan mga otoridad, an liwanag an pig-aapod na “SpaceX spiral,” sarong phenomenon na nahihiling an liwanag gikan sa fuel na pig-apon sa kalawakan kan mga nag-iikot na SpaceX rockets.
An nanutaran na liwanag an gikan soboot sa Falcon 9 rocket na piglunsar sa Cape Canaveral Space Force Station.
Nahiling an liwanag kasunod kan pag-deorbit kan second stage kan nasambitan ng rocket.
Karaniwan soboot na nag-iikot an second stage mantang pigluluwas kaini an fuel kaya nahihiling sa Earth an mala-spiral na liwanag mantang naglalaog sa atmosphere an rocket.
Kaidto, pigkokonsiderar ining pambihira alagad nagigin madalas na ngunyan mantang nagdadakol an piglulusar na Falcon 9 rocket.
Pigsierto man kan mga eksperto na salbado asin dae dapat ikahadit sa nasambitan ng phenomenon.
